Mae Awdurdod Parc Cendlaethol Eryri wedi dechrau’r broses o baratoi Cynllun Datblygu Lleol Eryri newydd. Mae’r CDLl yn nodi beth y gellir ei adeiladu a ble. Mae’n mynd i’r afael â’r angen a’r lleoliadau am dai, cyflogaeth, cyfleusterau cymunedol, manwerthu, mannau agored a defnyddiau tir eraill.
Bydd y CDLl newydd yn cwmpasu cyfnod rhwng 2026 a 2041. Bydd yn pennu sut y byddwn yn gwneud penderfyniadau cynllunio a datblygu yn y Parc Cenedlaethol yn y dyfodol.
Adroddiad Adolygu
Mae’n ofynnol i Awdurdodau Cynllunio Lleol adolygu eu CDLl i sicrhau bod CDLlau a’u sylfaen dystiolaeth yn cael eu diweddaru er mwyn darparu sylfaen gadarn ac effeithiol ar gyfer gwneud penderfyniadau cynllunio.
Y cam cyntaf felly oedd paratoi Adroddiad Adolygu Cynllun Datblygu Lleol Eryri a fu yn destun ymgysylltiad rhanddeiliaid rhwng 7 Ebrill 2023 a 12 Mai 2023.
Gweld Adroddiad Adolygu Cynllun Lleol Eryri
Cytundeb Cyflawni
Mae’r Cytundeb Cyflawni yn nodi:
1. Amserlen o’r Camau Allweddol ar gyfer paratoi’r CDLl Newydd; a’r
2. Cynllun Cynnwys Cymunedau sy’n datgan sut a phryd gall rhanddeiliaid a chymunedau gyfrannu yn ystod y broses o baratoi’r Cynllun.
Roedd y Cytundeb Cyflawni yn destun ymgynghoriad cyhoeddus rhwng Mai’r 16eg 2025 a Mehefin y 27ain 2025, a chafodd ei fabwysiadu’n ffurfiol gan Aelodau’r Awdurdod ar y 10fed o Fedi 2025
Ar y 3ydd o Hydref, cytunodd Llywodraeth Cymru’n ffurfiol i Gytundeb Cyflawni’r Awdurdod, gan gadarnhau’n swyddogol yr amserlen ar gyfer paratoi’r CDLl newydd a sefydlu’r Cynllun Cynnwys Cymunedol.
Gweld llythyr Llywodraeth Cymru
Beth sy’n digwydd rŵan?
Rhwng Tachwedd 2025 ac Ebrill 2027, byddwn yn y cyfnod ‘Cyfranogiad Cyn-adneuo’. Yn y cam hwn rydym eisiau dod i adnabod y prif faterion a’r opsiynau posibl i bolisi cynllunio ymateb iddynt.
Er mwyn hwyluso’r broses, rydym wedi paratoi holiadur anffurfiol ar gyfer trigolion Parc Cenedlaethol Eryri lle hoffem glywed eich barn chi ar faterion polisi cynllunio allweddol yn eich ardal leol. Gellir cael mynediad at yr Holiadur isod a’r dyddiad cau yw’r 12fed o Ragfyr 2025.
Cadw mewn cysylltiad
Os ydych yn dymuno derbyn gohebiaeth reolaidd ynglŷn â’r broses o baratoi’r Cynllun Datblygu Lleol newydd (gan gynnwys ymgynghoriadau) yna cofrestrwch eich manylion gan ddefnyddio’r ffurflen isod.
Cofrestru ar fas-data cysylltiadau Cynllun Datblygu Lleol Eryri